Молитвенник

Гопаченко Александр Михайлович

Достойно есть… Честнейшую херувим… и проч. (см. стр. 9).

Ложась в постель, знаменуй себя крестом и говори:

Да воскреснет Бог, и расточатся врази Его, и да бежат от лица Его ненавидящии Его. Яко исчезает дым, да исчезнут; яко тает воск от лица огня, тако да погибнут беси от лица любящих Бога и знаменующихся крестным знамением и в веселии глаголющих: радуйся, пречестный и животворящий кресте Господень, прогоняющий бесы силою на тебе пропятаго Господа нашего Иисуса Христа, во ад сошедшаго и поправшаго силу диаволю и даровавшаго нам тебе, крест Свой честный, на прогнание всякаго супостата. О, пречестный и животворящий кресте Господень! помогай ми со Святою

Госпожею Девою Богородицею и со всеми святыми во веки. Аминь.

Или: Огради мя, Господи, силою честнаго и животворящаго Твоего Креста, и сохрани мя от всякаго зла.

Когда предаешься сну, говори:

В руце Твои, Господи Иисусе Христе, Боже мой, предаю дух мой; Ты же мя благослови, Ты мя помилуй и живот вечный даруй ми. Аминь.

Молитвы на разные случаи

Призывание Духа Святого на всякое доброе дело

Царю Небесный (стр. 3).

Тропарь, гл. 2. Творче и создателю всяческих, Боже, дела рук наших, ко славе Твоей начинаемая, Твоим благословением спешно исправи, и нас от всякаго зла избави, яко един всесилен и Человеколюбец.

Кондак, гл. 2. Скорый в заступление и крепкий в помощь, представи благодатию силы Твоея ныне, и благословив укрепи, и в совершение намерения благаго дела рабов Твоих произведи; вся бо, елика хощеши, яко сильный Бог творити можеши.

Благодарение за всякое благодеяние Божие

Тропарь, гл. 4. Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю, Спасе наш, слава Тебе.

Кондак, гл. 3. Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по сим приносим, и Тебе яко Благодетеля и Творца славяще, вопием: слава Тебе, Боже всещедрый.

Богородичен, гл. 3. Богородице, христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех нас бед Твоими молитвами всегда избави, едина вскоре предстательствующая.

Песнь хвалебная св. Амвросия

Тебе Бога хвалим, Тебе Господа исповедуем. Тебе превечнаго Отца вся земля величает. Тебе вси ангели, Тебе небеса и вся силы. Тебе херувими и серафпмп непрестанными гласы взывают: свят, свят, свят Господь Бог Саваоф, полны суть набеса и земля величества славы Твоея! Тебе преславный Апостольский лик, Тебе пророческое хвалебное число. Тебе хвалит пресветлое мученическое воинство, Тебе по всей вселенней исповедует святая Церковь, Отца непостижимаго величества, поклоняемаго Твоего истиннаго и Единороднаго Сына и Святаго Утешителя Духа. Ты Царь славы, Христе, Ты Отца присносущный Сын еси; Ты ко избавлению приемля человека, не возгнушался еси Девическаго чрева. Ты, одолев смерти жало, отверзл еси верующим Царство небесное. Ты одесную Бога седиши во славе Отчей, Судия приити веришися. Тебе убо просим: помози рабом Твоим, ихже честною Кровию искупил еси. Сподоби со святыми Твоими в вечной славе Твоей царствовати. Спаси люди Твоя, Господи, и благослови достояние Твое; исправи я и вознеси их во веки. Во вся дни благословим Тебе, и восхвалим имя Твое во век и в век века. Сподоби, Господи, в день сей без греха сохранился нам. Помилуй нас, Господи, помилуй нас; буди милость Твоя, Господи, на нас, якоже уповахом на Тя. На Тя, Господи, уповахом, да не постыдимся во веки. Аминь.

О путешествующих

Тропарь, гл. 2. Путь и истина сый, Христе, спутника Ангела Твоего рабом Твоим ныне, якоже Товии иногда, поели сохраняюща и невредимых, ко славе Твоей, от всякаго зла во всяцем благополучии соблюдающа, молитвами Богородицы, едине Человеколюбче.

Кондак, гл. 2. Луце и Клеопе во Еммаус спутешествовавый, Спасе, сшествуй и ныне рабом Твоим, путешествовати хотящим, от всякаго избавляя их злаго обстояния; вся бо Ты, яко Человеколюбец, можеши, хотяй.

Молитва: Господи Иисусе Христе, Боже наш, истинный и живый путю, состранствовати мнимому Твоему Отцу Иосифу, и Пречистой Ти Деве Матери, во Египет изволивый и Клеопе во Еммаус спутешествовавый; и ныне смиренно молим Тя, Владыко Пресвятый, и рабом Твоим сим Твоею благодатию спутешествуй. И якоже рабу Твоему Товии Ангела Хранителя и наставника поели, сохраняюща и избавляюща их от всякаго злаго обстоянпя видимых и невидимых врагов, и ко исполнению заповедей Твоих наставляюща, мирно же и благополучно и здраво препровождающа, и паки цело и безмятежно возвращающа; и даждь им все благое свое намерение ко благоугождению Твоему благополучно в славу Твою исполнити. Твое бо есть, еже миловати и спасати нас, и Тебе славу воссылаем со безначальным Твоим Отцем, и со Пресвятым и благим и животворящим Твоим Духом, ныне и присно, и во веки веков. Аминь.

О болящих

Тропарь, гл. 4. Скорый в заступлении един сый, Христе, скорое свыше покажи посещение страждущему рабу Твоему, и избави от недуг и горьких болезней, и воздвигни во еже пети Тя и славити непрестанно, молитвами Богородицы, едине Человеколюбче.

Кондак, гл. 2. На одре болезни лежащаго и смертною раною уязвленнаго, якоже иногда воздвигл еси, Спасе, Петрову тещу и расслабленнаго на одре носимаго, сице и ныне, Милосерде, страждущаго посети и исцели: Ты бо еси недуги и болезни рода нашего понесый и вся могий, яко Многомилостив.

Молитва: Владыко Вседержителю, Святый Царю, наказуяй и не умерщвляяй, утверждаяй ниспадающия и возводяй низверженныя, телесныя человеков скорби исправляяй, молимся Тебе, Боже наш, раба Твоего (имярек) немощетвующа посети милостию Твоею, прости ему всякое согрешение вольное и невольное. Ей, Господи, врачебную Твою силу с небес ниспосли, прикоснися телеси, угаси огневицу, укроти страсть и всякую немощь таящуюся, буди врач раба Твоего (имярек), воздвигни его от одра болезненнаго и от ложа озлобления цела и всесовершенна, даруй его Церкви Твоей благоугождающа и творяща волю Твою, Твое бо есть, еже миловати и спасати ны, Боже наш, и Тебе славу воссылаем Отцу и Сыну и Святому Духу, ныне и присно и во веки веков. Аминь.

О заключенных

Тропарь, гл. 2. Манассию от уз и горькаго заточения, молитв ради свободивый, всещедрый Боже, и раба Твоего нами ныне молящагося, от уз и заточения свободи, и от всякаго злаго обстояния избави, яко един Человеколюбец.

Кондак, гл. 5. Яко милосердия источник и благости пучина, Христе Боже, не презри в скорбех и бедах Тебе верою призывающих, но яко щедр помилуй и от уз скоро свободи, да поем Ти: аллилуиа.

Молитва: Господи Иисусе Христе, Боже наш, святаго Апостола Твоего Петра от уз и темницы без всякаго вреда свободивый, приими, смиренно молим Ти ся, моление сие милостивно во оставление грехов раба Твоего (имя) в темницу всаженнаго и молитвами того, яко Человеколюбец, всесильною Твоею десницею от всякаго злаго обстояния избави и на свободу изведи.